曼联翻生主Ｗ得米
新仔对办前线重现活力
今晚喺新加坡上演嘅国冠盃有好戏码，英超「红魔」曼联硬撼意甲国际米兰。「红魔」之前两场热身赛新人当道，表现有板有眼，前线重现活力，加上有保罗普巴同桑马达等「大佬」压阵，面对阵容不整嘅「蓝黑兵团」，曼联準备工夫同状态都略胜一筹，1.95倍主胜唔好错过。
（无綫85台及myTV Gold周六晚7时30分直播）
国际米兰上季获意甲第4名，嚟紧继续有得踢欧联，为咗更上一层楼，佢哋新季搵嚟干地执教，呢位意大利名帅大展拳脚，梗係希望引入自己心仪嘅球员，头号目标係今仗对手曼联前锋卢卡古，不过会方认为卢卡古身价过高，令到成事机会不大，搞到干地对球会嘅转会操作劲不满。
国米阵容不整难有作为
除增兵遇阻带外，国米上季首席射手莫路伊卡迪亦决心他投，今次并冇随队到亚洲，另一阿根廷射手拿达路马天尼斯刚刚踢完美洲盃未归队，塞内加尔国脚基达巴尔迪又踢紧非国盃，锋力可谓大打折扣，更何况后防新兵「铁血中坚」高甸亦未同球队会合，今仗阵容不整，想降「魔」恐怕有心无力。
誓要重振雄风嘅曼联备战新球季相当积极，除密密签人外，亦踢咗两场热身赛，当中格连活特同新兵云比沙卡均获上阵机会，效果仲唔曳添，佢哋两个上仗对列斯联就合力炮製红魔第一球入波，连同「新杰斯」丹尼尔占士，曼联进攻重现久违嘅活力，搭住两位中场「大佬」保罗普巴同桑马达，新旧融合下有望擦出火花，主胜值博。