（myTV Gold 303、Now 643、有線656及616台周三凌晨4時直播）
馬體會主帥施蒙尼一向重視防守，尤其係歐聯淘汰賽，佢過去帶領「床單兵團」出戰29場歐聯淘汰賽，法定時間只失24粒，並有20場開2球或以下，極為保守。呢位鐵血教頭再將防守升級，今屆以荷西基文尼斯、史提芬沙域及馬里奧靴莫素為首，改踢3人防線，並用防中佐治高基做掃蕩，配合其他中前場球員勤於逼搶，大大減輕防線壓力，佢哋啱啱聯賽輸畀利雲特，被打破今季各項賽事16仗主場不敗身，受過教訓今仗一定小心為上。
車路士控球打法保後防
原本風雨飄搖嘅車仔，自從杜曹於1月尾接手後，立即重上正軌，呢名德國主帥同樣轉打3人防線，以艾斯派古達、安達斯基斯坦臣及魯迪格鎮守中路，但有別於馬體會嘅勇悍，他起用組織型防中佐真奴費路及高華錫，藉着控球打法保護防線，車仔近7場只失2球，防守效果立竿見影。杜曹帶領巴黎聖日耳門喺上屆歐聯屈居亞軍，5場淘汰賽只失4粒，嚟到車路士，相信仍可保持一貫水準。