兩支近期表現回勇嘅球隊對碰，錫菲聯主場迎戰車路士。錫菲聯近期頻頻搶分，但對勁旅點都會安守本分，打出最耍家嘅穩守突擊，車路士喺杜曹接手後，3場聯賽全部保持不失，不過佢似乎仍未搵到最佳攻擊組合，今場即使贏波都未必係大炒格，寧捧2.5球入球細。（Now 621周一凌晨3時15分直播）
錫菲聯經歷開季17場聯賽不勝後，近5場聯賽3勝2負表現回勇，作客2比1擊敗曼聯一仗可謂今季代表作，上周中主場亦以相同比數殺退西布朗，全取3分，護級露出曙光。
不過有一點值得留意，其實呢兩場勝仗中間，係夾住1場作客曼城，嗰場錫菲聯以0比1輸波；睇番賽後統計，錫菲聯控球率只得25%，射門4次只有1次中目標，全場1個角球都冇，基本上係全軍退守。領隊韋達深明對住勁旅硬碰硬冇着數，即使上半場9分鐘已經失波，但球隊保持紀律性，冇急於反撲，雖然未能扳平，但不致多失，預料今場鬥車路士情況一樣。
攻力問題未解決
作客嘅車路士自杜曹上任後，球隊戰術亦重新建立，以控、傳為主嘅踢法令「車仔」能夠控制戰局，343陣式亦令攻守更平衡，令球隊3場保持不失。杜曹正努力尋找最佳進攻陣式，因為委派赫臣奧杜爾出任輔鋒，抑或基斯甸普列錫做「假9」，都未能支援迪姆華拿入波，上場擊敗熱刺都只係靠12碼，遇着死守嘅錫菲聯隨時老鼠拉龜，捧2.5球入球細啱數。【华体网波经频道】