澳職新季賽程畀疫情打亂，唔少賽事都要改期，喺大部分球隊都踢咗2至3場下，珀斯光輝今日先首度亮相，主場迎戰信心十足嘅阿德萊德聯。光輝今場將要以殘陣出擊，相反阿德萊德聯愈戰愈勇，可以直取客勝。
（周三晚6時20分開賽）
珀斯光輝備戰新球季諸多阻滯，上年12月初不敵FC東京結束亞冠盃之旅，今仗係佢哋1個多月後首場正式比賽，大軍踢完亞冠盃返澳洲後，又要進行2個星期隔離，大大影響開季備戰，球員狀態又點會好？
阿德萊德聯新星有驚喜
陣容方面，光輝亦嚴重不整，日本球星太田宏介只係啱啱展開隔離，曾踢過德甲嘅蘭金更加未返到澳洲，加上中場核心兼隊長迪亞高卡斯度受傷，今場戰力隨時得番一半。唔好忘記，光輝對上5季開咧戰都贏唔到波，證明球隊要經過一段時間先Run得順。
作客嘅阿德萊德聯自從上季尾由維亞特執教後，7場賽事3勝4和未輸過，包括今季0比0和西部聯，以及上仗2比0輕取勁旅墨爾本城，17歲新星穆罕默德托尼更加技驚四座，成為阿德萊德聯今季一大武器，今場有力打敗殘陣出戰嘅主隊，客勝要捧。【华体网波经频道】