周五凌晨西甲补赛，「银河舰队」皇家马德里主场斗华伦西亚。目前皇马落后榜首巴塞隆拿5分，一定要急起直追，喺下星期远征世冠杯前尽量抢分。华伦西亚炒咗教练加度素，球队乱上加乱，球员都要争取表现自求多福，两军交手向来多波入，近7场有5次开3球或以上，推介2.5球入球大。
（Now 632周五凌晨4时直播）
皇马上场联赛斗第3嘅皇家苏斯达，最终互交白卷益咗巴塞隆拿；其实皇马嘅巴西前锋云尼斯奥斯祖利亚表现好生猛，入唔到波只系略欠运气，今场遇上后防麻麻地嘅华伦西亚，相信要入波唔会太难。
「银河舰队」仲有一大武器，佢就系法国射手宾施马。呢名老将对住华伦西亚简直系食自助餐一样，对上6次交手全部都有士哥，合共射入8球，不论华伦西亚换过几多个教练，后防转过多次人都好，就系阻唔到宾施马入波。由于皇马踢完今场同下场联赛作客斗马略卡之后，就要远征摩洛哥踢世冠杯，今场当然要入多几粒抢分兼壮行色。
蝙蝠兵团易帅乱糟糟
「蝙蝠兵团」华伦西亚刚炒咗加度素，由禾路担任临时教练，球会内部乱糟糟，9年间换咗10个主帅，搞到球员人人自危，为咗要保住个正选位，相信嚟紧几场都特别落力。事实上，华伦今季搵咗卡云尼返嚟，进攻唔算差，入波数字喺西甲排第6，今场有力同皇马斗攻；既然两军近7场对碰有5次开3球或以上，今场一于推介中位数2.5球嘅入球大。
